Асыл  құс

Басқы бет

            Ерте заманда бір патша болыпты. Патшаның үш баласы бар екен. Ең үлкенінің аты Асан, ортаншысының аты Үсен, ал ең кенже баласының аты Хасан екен. Хасан өте сұлу, ақылды, әрі батыр, ақкөңіл бала болып өседі.

Патша ұйықтап жатып түс көреді, түсінде бір ғажайып құс көреді. Құстың күлсе аузынан будақ-будақ гүл түседі, жыласа көзінен моншақ-моншақ маржан түседі. Міне, патша осы құсқа ынтық болады. Дереу орнынан тұрысымен Асан  мен Үсенді шақыртып алып айтады: 

- Мен түсімде бір тамаша, өмірімде көрмеген құсты көрдім, өзі өте сұлу, күлсе аузынан будақ–будақ гүл түседі, жыласа көзінен моншақ-моншақ маржан түседі, осы құсты тауып әкеп бермесеңдер бастарынды аламын, - дейді.Асан мен Үсен әкесінен қорыққанынан:

           - Қайдан да болса тауып әкеліп береміз, - деп  уәде береді де жол жүріп кетеді. Бұл оқиғаны Хасан білмейді. Хасан Асан мен Үсенді күлсе аузынан будақ-будақ гүл түседі, жыласа көзінен моншақ-моншақ маржан түсетін құсқа жұмсағанын қырық күннен кейін барып біледі. Асан мен Үсенді осындай алыс жолға жұмсап, өзінің үйде қалғанына қапа болып, әкесіне жылап келеді.

           - Әке, - дейді Хасан, - Асан мен Үсенді жұмсаған  жаққа мені неге жұмсамадыңыз, әлде мені ол екеуінен жек көресіз бе, я болмаса маған сенбедіңіз бе? Патша айтады:  

          - Жоқ, балам, олай емес, мен Асан мен Үсенді өте қатерлі қиын жолға жұмсадым. Ал сені ол қиын сапарға жұмсауға қимадым!   Хасан әкесіне жалынып, сол құсты іздеуге разылығын алып, ел-жұртымен қош айтысып, екі ағасының артынан кетеді.  40 күн бұрын кеткен ағаларын  Хасан қуып жетеді. Ағайынды үшеуі бір үлкен жолға түсіп жүре береді. Бір күндері бұлардың жүріп келе жатқан жолы үш айырылады. Бір жол оңға, бір жол солға, бір жол тура бетімен. Әр жолдың басында үлкен тас тұр, тастың бетіне ойып жазған жазу бар. Бірінші жолда «Барса келер», екінші жолда «барса мүмкін келер, мүмкін келмес», «Барса келмес» деп жазылған. Асан «Барса келер» жолына, Үсен «Барса мүмкін келер» жолына, ал Хасан «Барса келмес» жолына түсіп жүре береді. Бірнеше ай, бірнеше күн жүргеннен кейін Хасанның алдынан бір үлкен қала көрінеді, қаланың айналасында көп киік жайылып жүр екен. Хасанның осы кезде азығы таусылып бірнеше күннен бері ас ішпей ашығып келе жатқан кезі екен. Киіктің біреуін атып алайын деп беліне асынған садағын алып кезене бергенде, киіктердің бәрі маңырап Хасанды қоршап алып, мұңды дауыспен шулап кетеді. Хасан киіктерді атпайды, «бұл жануарларға не болған» деп ойланып, ешнәрсеге түсінбестен қаланың ішіне кіреді. Бір үлкен сарайдың ішіне кіріп, «кім бар» деп дауыстап еді, ешкім жауап бермеді. Жан-жағына қарап еді, бір алтын табақ тола қуырылған етті көреді, әбден ашыққан Хасан етті жемекші болып, табаққа қолын сала бергенде:  

      - Ай, адамзат, тарт қолыңды!, - деп үсті-басы алба-жұлба, тісі ақсиған, түсінен адам қорқатын бір кемпір келіп, бір нәрселерді айтып аузын күбірлетті де, жерді теуіп қалды. Жалмауыз кемпір Осы кезде Хасан киікке айналды. Әлгі кемпір Хасанның мойнынан жетектеп жаңағы маңырап, Хасанның алдынан шыкқан киіктерге апарып қосты. Хасан адамгершілік түрінен айрылғанымен, ақылынан адаспады. Көп киіктен бөлініп жаңағы өзі келген жағына қарай жүре берді. Бірнеше күн өткеннен кейін, алдынан жаңадан соғылған үлкен сәулетті бір сарай көрінді. Киік болған Хасан сол сәулетті сарайдың ішіне кірді, алдынан бір сұлу қыз шығып киікке қарап: 

       - Сен киік емессің ғой, адамзатсың ғой, егерде мен сені адамгершілік қалпыңа келтірсем, сен мені аласың ба? - деп сұрап еді, киік-Хасан тіл қатпады. Қыз айтты:

      - Сені киікке айналдырып жіберген менің залым анам ғой, сенің тіліңді де сөйлетпей қойыпты ғой, - деді де киік - Хасанның бетіне бір уыс топырақ шашып жіберіп еді, Хасан бұрынғысынан да сұлу жігіт болып шықты. Хасан адамгершілік қалпына келген соң, қызбен сыпайы амандасып, қызға үлкен алғыс айтты және де басынан өткізген тарихын баян етті. Қыз да басынан  өткен-кеткенін Хасанға айтып берді. Қыз айтты:

      - Мен сол сені киікке айналдырған жалмауыз кемпірдің жалғыз қызы едім, шешемнің адамға жасаған дұшпандығына төзе алмай, еншімді алып бөлек шығып едім. Мен өмірімде адам баласын көрмей жалғыз өтермін деп қапылықта отыр едім, құдай сені маған кездестірді, мен сенің соңыңнан қалмаймын, - деді. Хасан айтты:

        - Мен Әкеме берген уәдемді орындамай саған үйлене алмаймын, - деді. Қыз сұрады:

      - Әкеңе не уәде берген едің?. Хасан әкесінің түсінде бір тамаша құсты көргенін, күлсе ауызынан будақ-будақ гүл түсетінін, жыласа көзінен моншақ-моншақ маржан түсетінін айтты. Сол құсқа әкесінің көруге құмар болып, екі ағасын тауып әкеліңдер деп жұмсағанын, ағаларының артынан өзінің өтініп, қандай қиындық болса да төзіп, қайдан да болса тауып әкеліп беремін деген уәдесін айтты. Қыз Хасанның бұл сөзін естіп жылай берді.      

       - Сен бұл құсты іздейтін болсаң маған жоқсың, - деді. Бұл құс менің құсым еді, адамша сөйлей алатын еді. Менен бұл құсты перінің патшасының Күлжаһмал деген қызы әскерімен келіп тартып алып кеткен еді. Ол перінің елін іздеп табарсың-ау, бірақ та құсты саған оңайлықпен қидыра қоймас, - деді. Хасан айтты:   

      - Мен қандай қиындық болса да төзуге тиіспін, қайдан да болса құсты әкеме тауып апарып беру менің борышым, ал құсты аман-есен тауып алып қайтсам алдымен саған келемін, сенен басқа ешкімге үйленбеймін, - деді. Қыз Хасанның беттеген жағынан қайтпайтынын білген соң, Хасанға рұқсат беріп, жөн сілтеді.

      - Батысқа қарай 90 күн жүресің, одан кейін алдыңнан аспанмен таласқан биік тау кездеседі. Сен сол таудың арғы жағына 90 күн дегенде өтерсің. Сол таудың арғы түбінде үлкен жалғыз түп бәйтерек бар.  Сол бәйтеректің басында самұрық құстың ұясы бар. Сені мүмкін сол самұрық перінің еліне жеткізер, - деді. Содан кейін қыз:  

      - Менің залым шешем тірі тұрғанда екеуімізді бірге өмір сүргізіп қоймайды. Бір зиянын тигізеді, менің шешемнің ажалы мынадан болады, - деп бір садақтың оғын берді.

   – Қалай қарап атсаң да, менің шешемнің маңдайына тиеді, - деді. Хасан садақтың оғын алып, көп кідірместен атып жіберді, атылған оқ жалмауыз кемпірдің маңдайына тиіп сол заматта өлді.  Бұдан кейін Хасан қызбен қош айтысып батысқа қарай жүріп кетті. Қыз айтқандай Хасан 90 күн жүріп аспанмен таласқан үлкен тауға кездесті, таудың ар жағына 90 күнде зорға дегенде асып түсті. Үлкен жалғыз түп бәйтерекке келіп саясында дем алып отыр еді:

   - Әй, адамзат, бізді өлімнен құтқар, құтқар!, - деп шырылдаған самұрық құстың балапандарының даусын естіді. Хасан «Бұл мүсәпірлерге не болды?», - деп қарап еді, бір үлкен айдаһар жылан балапандарды жұтуға әзірленіп бәйтеректің басына қарай жылжып өрмелеп бара жатыр екен. Хасан көп ойланбай, дереу қынабындағы қылышын суырып алып айдаһарды бірнеше жерден шауып өлтірді. Самұрық құстың балапандары өлімнен аман-есен құтылғандарын біліп, Хасанға көп рақмет айтты, ашығып отырған балапандар айдаһар етін жеп тойынып алды. Дәл осы кезде қатты жел тұрып нөсер жауды, Хасан балапандардан сұрады: 

    - Бұл не қылған жел, не қылған нөсер жаңбыр? - деп. Балапандар айтты: 

     - Бұл жел емес, біздің анамыздың қанатының лебі, ал жаңбыр дегеніңіз біздің анамыздың көз жасы. Біздің анамыз жылда осы бәйтеректің басына жұмыртқалап, балапан ашып шығарады екен. Анамыз балапандарына тамақ іздеп кеткенде, жаңағы сіз өлтірген айдаһар іннен шығып біздің анамыз алып шығарған балапандарды жеп қояды екен де, анамыз қайтып келгенше ініне қайта тығылып қалады екен. Қазір біздің анамыз аң аулап келе жатыр, біздерді тірі ме, әлде айдаһар жылан жеп қойды ма деп жылап келе жатыр. Міне, жаңбыр емес, біздің анамыздың көз жасы, - деді. 

    - Біздің анамыз, - деді балапандар,     адамзаттың етіне сондай құмар. Сізді көрсе дереу жұтып жіберуі мүмкін, сондықтан сіз біздің қанатымыздың астына жасырына тұрыңыз, - деді. Хасан балапандардың қанатының астына жасырынды. Бір мезгілден кейін самұрық құс келіп бәйтеректің басына қонды. Самұрық құстың салмағынан бәйтерек иіліп жерге тиді. Балапандарының тамағына бұғы, киік тағы басқа аңдарды алып келіп үйіп тастады. Балапандарының тірісін көріп көз жасын тыйып қуанып кетті. Дәл осы кезде күн де жадырап ашылып, жел де тиылды. Бір кезде самұрық құс тамсанып жан-жағына қарай берді:   

       - Адамзаттың исі шығады, сендер көрген жоқсыңдар ма? - деді. Балапандары айтты: 

     - Егер сіз бір қасық қанын кешірсеңіз, біз адамзатты көрсетелік, - деді. Самұрық «мақұл» дегендей басын изеді, балапандар қанатының астындағы Хасанды көрсетіп еді, самұрық Хасанды жұтып жіберді. Балапандар шыр-шыр етіп, анасының тамағынан ұстай алды. Самұрық Хасанды қайтып жұтпай тастады. Содан кейін самұрық балапандарынан оларға қандай жақсылық жасағанын сұрады. Балапандары бұл адамзаттың айдаһарды өлтіріп, оларды ажалдан құтқарғанын айтты. Самұрық Хасанға үлкен алғысын айтып, не жұмыспен келгенін және де қандай жәрдем керек екенін сұрады. Хасан басынан кешкен оқиғасын түгін қалдырмай бастан-аяқ айтып берді және перілердің жеріне жеткізіп тастауды өтінді. Самұрық келісіп, жол қамына кірісті. Балапандарына өзі оралғанша жетерлік ауқат жинап беріп, жолда жейтін ауқатын алып, Хасанды үстіне мінгізіп, перінің жеріне қарай ұшады. Самұрық құс бір жеті ұшады, мұхиттан өтеді, шөлден өтеді, от дариясынан өтуге жақындағанда ауқаты таусылып, басы айналып, көзі қарауытқан самұрық қатты састы. Хасанға самұрық әлінің құрып, құлауға айналып, барамыз деген жеріне жете алмаулары мүмкін екенін айтты. Хасан дереу екі санының етінен екі жапырақ ет кесіп, самұрықтың аузына тосты, самұрық Хасанның берген етін жеп, күшіне келеді. Содан кейін самұрық Хасаннан сұрайды:  

      - Бұл қайдан шыққан ет? Сондай дәмді, әрі күш беретін ет екен,—дейді. Хасан айтты:   

     - Мен сізге санымның етін кесіп бердім. Самұрық Хасанның екі санындағы жарасын дереу қанатымен сипап еді, жара жазылып кетті. Осыдан кейін көп ұзамай-ақ самұрық пен Хасан перінің жеріне келіп жетті. Самұрық айтты:  - Перілер ұйықтаса, қырық күн ұйықтайды. Перілердің ұиықтағанына қазір үш күн болыпты. Мен сені осы жерде үш күн күтемін, үш күнде қайтып келмесең, мен саған қарамай-ақ ұшып кете беремін, - дейді. Хасан үш күнде қайтып келуге уәде беріп қалаға кетеді. Қала өте сүлу екен, ылғи алтыннан соғылған, бұрын мұндай сұлу қала көрмеген Хасан қаланы тамашалап, құсты да, самұрықты да ұмытып кетеді. Хасан бір кезде қаланы аралап жүріп бір үлкен тамаша соғылған сарайға кіреді. Сарайдың ішінде қырық қыз ұйықтап жатыр екен, ар жағында оңаша бір бөлмеде алтын кереуеттің  үстінде тағы бір қыз ұйықтап жатыр. Одан әрі тағы бір бөлмеге кіріп еді, жаюлы дастарқан, неше түрлі тамақ. Тамақтан алып жейін деп еді, бір нәрсе шаңқ ете қалды:

   - Әй, адамзат, біреудің тамағын неге рұқсатсыз жейсің? - деп күліп жібергенде ауызынан будақ-будақ гүл түсті.  Хасан қараса, өзінің іздеп келген құсы екен, алтын қапаста отыр. Хасан қуанып кетті. Құсты алып самұрыққа тез қайтпақшы болып, құсқа ұмтылғанда құс шар ете түсті.

   - Сен мені алып кете алмайсың, — деді, — егерде мен ащы даусыммен сайрасам осы қалада ұйықтап жатқан перілердің бәрі оянады. Ал сенің бір мысқал етің бұл жерде 1000 тіллә тұрады, мені ескертпеді деп өкпелеме, ендігісін өзің біл, — деді. Хасан құсқа жалынып жылай берді. Жолда көрген уақиғаларын және де құстың бұрынғы егесімен қосылмақшы болып уәделескенін айтты. Құс Хасанның көңілін қимай: 

     - Мақұл, мені алып кете ғой, бірақ та жолда көрген оқиғаларыңды айтып хат жазып ана бөлек бөлмеде ұйықтап жатқан қыздың қалтасына сал, - деді. Хасан құстың айтқанын орындады. Содан кейін құсты алып самұрыққа келді. Самұрық енді болмаса, ұшып кетейін деп отыр екен. Хасан құспен самұрықтың  арқасына мініп, көп қиындық көрмей, самұрықтың  балапандарына аман - есен жетті. Ар жағына жету үшін самұрық қанатының бір  қауырсынын үзіп берді. Хасан құспен самұрықтың қанатының  қауырсынына мініп уәделескен қызына келді.  Қыз қуанып Хасанды, құсты бар ынтасымен қарсы алды. Бірнеше күн дем алған соң Хасан қызды, құсты алып, самұрық берген қауырсынға мініп, еліне қарай жүріп кетті. Бірнеше күн жүрген соң, жаяу келе жатқан бір адамға жолықты. Қараса, ортаншы ағасы Үсен екен. Жолда жол азығы таусылып бір байдың малын бағып күнін көріп, енді еліне жаяу қайтып келе жатыр екен. Өзі әбден аштықтан азған, киімдері жыртық, үсті-басы сауыған кір. Хасан Үсенді суға түсіріп, үстіне жаңа киімдер кигізді. Тамаққа әбден тойғызды, сүйтіп өздерімен бірге қауырсынға мінгізіп келе жатса, Үсеннің халінен де жаман азып-тозған, биті торғайдай, мойны ырғайдай болған Асанға кездеседі. Хасан Асанды да тамаққа тойғызып, киіндіріп алып, қауырсынға мінгізіп алып жүре береді. Бір күні бұлар бір жерге келіп қонады. Осы кезде Асан мен Үсен ақылдасады. «Біздің әкеміз бұрын да біздің екеумізден Хасанды жақсы көруші еді, енді Хасан елге барған соң құсты мен таптым, қызды да өзім таптым дер, ал бізді аштан өлейін деп келе жатқан жерінен өзім тамаққа тойындырып алдым дер. Әкеміз екеуміздің байға жалданып мал баққанымызды естісе, менің атыма дақ келтірдіңдер деп дарға асуы да мүмкін дейді. Қайтсек те Хасанның көзін жою керек. Содан кейін құсты өзіміз тауып алып келдік дейміз». Екеуі осылай келісіп, Хасанға келеді, «бізге құдықтан су алып бер» -  дейді. Хасан келісіп беліне жіп байлап терең шыңырау құдыққа түседі. Екеуі Хасан құдықтың дәл ортасына жетісімен жіпті пышақпен кесіп жібереді. Хасанды құдыққа тастағаннан кейін Асан мен Үсен қызды «мен аламын», «мен аламын» деп таласады. Қыз екеуіне де тимей айдалаға қаңғып кетеді. Асан мен Үсен құспен еліне келеді. Әкесіне құсты алып келгенін баяндайды. Патша Асан мен Үсеннен Хасанның қайда екенін сұрайды. Асан мен Үсен:                                                                                                                                                    

      -Хасан біздің айтқанымызға көнбей, теңіздің суына шомылып жатқанда жайын жұтып кетті, - дейді. 

      - Бірақ, біз жайынды өлтірдік, Хасанның кегін алдық, - деді. Патша Хасанның өлгенін естіп, қатты қайғырып күн-түн демей жатып алды. Дәл осы күні перілер ұйқысынан оянады, перінің патшасының қызы қапастағы құстың жоқ екенін біліп қалаға жар салады. Қалтасындағы хатты көріп, құсты адамзаттың алып кеткенін біліп, пері патшасының қызы әскерімен құсты іздеуге аспанға ұшады. Хасанның әкесі әзі бір күні орнынан тұрмастан құсты сайратыңдар деп бұйрық береді. Құсты алтын қапасқа отырғызып сайратады. Құс қайғылы, мұңды үн, ащы дауыспен сайрайды. Дәл осы кезде құсты іздеп кең аспанды кезіп жүрген перінің қызының әскерлері Хасанның елінің үстіне адам болып түсе береді. Аспаннан адам жауған соң, Хасан елінің адамдары үрейленіп, қорқып патшаға келіп тығылады. Пері патшасының қызы әскерімен құстың тұрған жеріне келіп патшаны алдына шақырады. Патша жатқан орнынан тұрып, киімін киініп, белін буынып, аллаға сиынып, пері патшасының қызының алдына келеді. Пері қызы патшадан сұрайды:  

      - Ей, адамзаттың патшасы! Мына құсты қай балаңыз алып келді, соны көрсетсеңіз, мен сол балаңызбен сөйлесемін, - дейді.

      - Әй, пері қызы! Осы құсыңды мен түсімде көріп, бір көруге құмар болғаным рас. Алып келіңдер деп үш баламды жұмсағаным рас. Ал, сол үш баламнан екеуі аман-сау қайтып келді, ал ең кішісі жақсы көретін балам қайтпады, жолда балық жұтып кетті деп келді, өтірік-расын әлі анықтағаным жоқ.. Ал, сол баламның  қайғысынан мына құсты бірінші рет көріп тұрмын,  ендігісін ана тірі келген екі баладан сұраңыз, - деді де үйіне кетті. Пері қызы Асан мен Үсенді шақырып, құсты қалай алып қайтқандарын сұрады. Асан мен Үсен: - Еһ, қалай алып қайтатын несі бар, жүйрік атпен бардық та алып қайттық, - деді. Пері қызы айтты:

     - Сендер шындарыңды айтпай отырсыңдар, бәрібір мен қазір құсты сөйлетемін, құс барлық шындықты айтып, сендердің сөздерің өтірік болса, бастарыңды аламын, - деп, құсқа сөйле деп белгі берді. Құс жолда болған оқиғаның бәрін айтты: 

     - Хасан ақкөңіл қайырымды жігіт екен, жылап қоймағасын ергенім рас, Хасан мені алып менің бұрынғы егемнің үйіне келді. Содан кейін бәріміз осы жаққа келе жатқанымызда жолда азып-тозып, ашығып келе жатқан Асан мен Үсен кез болды. Хасан бұл екеуін тамаққа тойындырып, киім киіндіріп еді, бұлар оған қастық ойлап, құдыққа алдап түсіріп тастап кетті. Содан кейін менің бұрынғы иеме екеуі «мен аламын», «мен аламын» деп таласып еді, ол қыз екеуіне де тимей, айдалаға қаңғып кетті. Олардың аштан өлетін уағы болған жоқ, әлі тірі болуы мүмкін, - деді. Пері қызының бір әскері жер жүзін бір сағатта айналып шығатын жүйрік екен, пері қызы сол жүйрікті жұмсады, ал Асан мен Үсеннің басын кесіп алды. Пері қызының мұнысына патша қарсы болған жоқ. Асан мен Үсеннің басы алынып болған кезде жүйрік пері Хасан мен қызды алып келді. Пері қызы  Хасанның батырлығына, адамгершілігіне риза болып, құсты өз қолынан Хасанның әкесіне сыйлады. Патша пері қызына алғыс айтып, қырық күн той, отыз күн ойын жасады. Пері қызы әскерімен қонақ болды. Сонымен адамзат пен пері араласқан үлкен той болыпты.

үстіне