«Кәкенталдым – қасиетті мекенім»: кітабының тұсаукесері

10 қазан күні сағат 14.00-де А.С. Пушкин атындағы Шығыс Қазақстан облыстық кітапханасында Өскемен қаласының тұрғыны Шағырова Назигүл Уалханқызының «Кәкенталдым – қасиетті мекенім» атты кітабының тұсаукесері өтеді.

Назигүл Уалханқызы – Тарбағатай ауданы, Шілікті өңіріне қарасты Кәкенталды ауылында 1970 жылдың 30 қаңтарында дүниеге келген. Туған жерінің табиғатын, ауылдың тыныс-тіршілігін, қарапайым жандардың болмысын жүрегіне жақын тұтқан қаламгер үшін Кәкенталды – балалық шақтың ғана мекені емес, өмірінің өшпес ізі қалған, сағынышы мен сырын сақтаған қасиетті топырақ.
2016 жылы басынан өткерген күрделі отадан кейін өмірге екінші рет келгендей болғанп Назигүл Уалханқызы өмірге жаңаша көзқараспен қарап, қиындықты жеңудің өзіндік жолын тапты. Жазуды жанына ем етіп, шығармашылыққа бет бұрды. Күйзелістен психологиялық тұрғыдан көмек берген психологы Назигүл Абылқасқызы Таубакулованың қолдауына сүйеніп, өзін-өзі дамыту бағытындағы курстарға қатысады. Жазушы Назым Слямқызының «Кітап жазу» курсын тәмамдайды. Осылайша өмір сынағын шығармашылыққа айналдырып, өз ортасында тәжірибесімен бөлісетін, дертті жеңген жігерлі жан, мотивациялық бағыттағы автор ретінде танылды.
Автордың өмірлік тәжірибесі мен жүрек сырынан туған «Өмір өткелдері» кітабы 2022 жылы жарық көріп, оқырманның ыстық ықыласына бөленді. Ал 2023 жылы ана жүрегінен шыққан «Қызыма хат» атты шағын кітабын қызына тосынсый ретінде ұсынды.
2026 жылы оқырманға жол тартқан «Кәкенталдым – қасиетті мекенім» кітабы – қаламгердің туған жерге деген шексіз сағынышы мен ыстық махаббатының жемісі.
Бұл шығармада автор өзі туып-өскен Кәкенталдының көркем келбетін ғана емес, ауылдың қарапайым да қадірлі адамдарын, балалық шақтың естеліктерін, туған жердің топырағында, уақыт бедерінде қалған тағдырларды тебірене баяндайды.
Туған жер туралы жазу – өткенді еске алу ғана емес. Бұл – тамырды тану, тарихты құрметтеу, туған елге деген перзенттік парызды сезіну. «Кәкенталдым – қасиетті мекенім» – бір ауылдың ғана шежіресі емес, туған жерін сағынған әр жүрекке жақын сырлы дүние.

Қаламгермен жүздесіп, шығармашылық жолымен жақын танысқыңыз келсе, тұсаукесер кешіне келіңіз!