«Төл теңге күні»: интерактивті әдеби экспозициялық көрме

Достар! 15 қарашада атап өтілетін Қазақстандағы ұлттық валюта күні - еліміздің тәуелсіздігі мен экономикалық тұрақтылығын білдіретін маңызды оқиға. Осыған орай, А.С. Пушкин атындағы Шығыс Қазақстан облыстық кітапханасы сіздерді «Төл теңге күні» / «День национальной валюты тенге» атты әдеби интерактивті көрмеге (2 қабат, фойе) шақырады. 8-19 қараша аралығында көрмемен таныса аласыздар.

Ұлттық валюта күні ел тәуелсіздігінің символдарының бірі ғана емес, бизнес пен қаржы саласының да мерекесі. Әдеби экспозиция - теңге тарихына қызықты экскурсия жасауға, экономика мен бизнес саласындағы білімді толықтыруға, табыс тарихымен шабыттануға мүмкіндік береді. Ұсынылған кітаптардан теңгенің алғашқы қазақстандық ақша емес екенін білесіздер, ежелгі Қазақстан аумағында ақша көп ғасырлар бұрын пайдаланылған.
Теңге тарихына, айналымға енуіне байланысты М.Молдабаева «Төл теңгеміздің тарихы», «Қазақстан теңге сарайы», «Қазақстан Республикасының ұлттық валютасы», «Қазақстан бизнес кітабы», Е.Ш.Шаймерденов «Қазақстан Республикасының тәуелсіздік рәміздері», «Елтаным» сынды әдебиеттерден қарай аласыздар. «Қазақстан теңге сарайы» кітабында егемен еліміздің валютасы - төл теңгеміз және оның бетінде бейнеленген тарихи тұлғалар мен монеталардың жасалуының сапасы жайлы сөз қозғалады. Еліміздің алғашқы Президентінің «Қазақстан жолы» жинағында ұлттық валютаны енгізу және табысты банк жүйесін құру туралы қадамдар ашып көрсетілсе, «Қазақстан бизнес кітабы» еңбегі бүгінгі отандық қаржының жай-күйін, қаржы саласының дамуының негізгі бағыттарын баяндайтын басылым.
Сонымен қатар, көрмеге қаржылық сауаттылықты арттыруға көмектесетін «Кедей болуға мүмкіндік жоқ», «Қарызсыз қазақ», «Думай как финансовый директор», «Бизнес по-казахски», «Ойлан да байы» сынды т.б еңбектер қойылды. «Оқуға тиіс 10 кітап» сериясымен жарық көрген «Табыс», «Байлық», «Менеджмент», «Маркетинг» жинақтарында байлық тақырыбын зерттеген әлемге әйгілі ғалымдардың он кітабы еніп отыр.
Құрметті оқырмандар! Сіздерді кітапханамызға келіп, Қазақстанның ұлттық валютасы туралы көптеген жаңа, таңғажайып деректерді білуге шақырамыз.

Байланыс тел.:26 13-33