«Мұхамедхан Сейітқұлов – қазақ халқының рухани элитасының жарқын өкілі»

30 сәуір күні А. С. Пушкин атындағы Шығыс Қазақстан облыстық кітапханасында көрнекті қоғам қайраткері, ағартушы, меценат, алаш қозғалысының жанашыры Мұхамедхан Сейітқұловтың туғанына 155 толуына орай «Мұхамедхан Сейітқұлов - қазақ халқының рухани элитасының жарқын өкілі»атты онлайн-кездесу өтті.

Бұл кездесудің басты мақсаты – дара тарихи тұлғамыз Мұхамедхан Сейітқұловты еске алып қана қоймай, оның ұлттық руханият ісіне қосқан қомақты үлесін насихаттау.
Аталған шараға Мұхамедхан Сейітқұловтың немересі, Қайым Мұхамедханов атындағы Білім және мәдениет орталығының директоры Дина Қайымқызы Мұхамедхан; республикалық Егемен Қазақстан газетінің ардагері, Құрмет ордені мен Халықаралық Алаш әдеби сыйлығының иегері, Шәкәрім атындағы Семей мемлекеттік университетінің құрметті профессоры Дәулет Сейсенұлы; «Алаш арыстары Мұхтар Әуезов» музейінің меңгерушісі, жазушы-әдебиеттанушы Қуат Қазезұлы қатысты.
Онлайн кездесу барысында Мұхамедхан Сейітқұловтың өмір жолының маңызды кезеңдерінен сыр шертетін деректі фильмнен үзінді көрсетіліп, қонақтарымыз тарихи тұлғаға қатысты құнды деректерімен бөлісті.