«Жыр алыбы – Жамбыл»: әдеби ревю

8 мамыр күні сағат 11.00-де Өскемен қаласындағы Жамбыл саябағында қаламыздың санаулы әдеби ескерткіштері қатарына кіретін Жамбыл ескерткішінің қасында қазақтың ұлы ақыны Жамбыл Жабаевтың 180 жылдығына арналған әдеби ревю өтеді.

Жамбыл Жабайұлы – қазақ халық поэзиясының әйгілі тұлғасы, өлең сөздің дүлдүлі, жырау, жыршы. Жамбыл өзінің алдындағы аға буын өкілі Сүйінбай ақынды өзіне пір тұтқан. Ал Кенен Әзірбаев Ж. Жабаевты тәлімгері деп таныған. Көзінің тірісінде КСРО мемлекеттік сыйлығының лауреаты атанған. Жамбыл өлеңдері әлемнің көптеген тілдеріне аударылып, жарияланған.
Қазақ поэзиясының алыбы, «ХХ ғасырдың Гомері» атанған Жамбыл Жабаевтың сырлы да қуатты жырлары уақыт тынысымен бірге қайта түлейді. Біздің мақсатымыз – баба мұрасын жай ғана еске алу емес, оны жастардың санасында заманауи үлгіде жаңғырту.
Бұл шара – ақын рухы мен бүгінгі буынның еркін ойы тоғысатын бірегей шығармашылық кеңістік.
Әдеби ревю аясында қатысушылар мен көрермендер үшін бірнеше мазмұнды алаңдар ұйымдастырылады. Шараның негізгі бөлімі – «Айтыс алаңы». Мұнда жас ақындар сөз өнерінің құдіретін көрсетіп, суырыпсалмалық шеберліктерін ортаға салады. Бұл – Жамбыл бабамыздан қалған ұлы дәстүрдің тірі куәсі болғысы келетіндерге арналған алаң.
Сонымен қатар, саябақ аумағында «Поэтикалық квест» ұйымдастырылады. Қатысушылар Жамбыл өлеңдерінің үзінділерін іздеп тауып, QR-кодтар арқылы толық мәтіндерді құрастырып, ақын шығармашылығын интерактивті форматта меңгереді. Бұл – әдебиет пен технологияны ұштастырған ерекше формат.
Іс-шара барысында «Поэзия шеруі» өтеді. Жастар мен өнер майталмандары ақынның ең таңдаулы туындыларын мәнерлеп оқиды. Батырлық пен елдікті жырлаған термелер мен патриоттық жырлар саябақ аспанын тербетеді. Рухани демалыс пен ерекше әсер іздеген жандар үшін бұл бөлім нағыз сый болмақ!
Сондай-ақ, әдеби көрме ұйымдастырылып Жамбыл Жабаевтың шығармалары, зерттеу еңбектері, әдеби жинақтар және ақын мұрасына арналған ғылыми еңбектер қойылады.

Байланыс телефоны: +7 705 624 1725, Абылгазинова Г.