«Балалар әдебиетінің бәйтерегі» республикалық онлайн форсайт-форумы

2024 жылдың 13 қарашасы күні сағат 15.00-де А.С. Пушкин атындағы Шығыс Қазақстан облыстық кітапханасының ұйымдастыруымен Zoom платформасында «Балалар әдебиетінің бәйтерегі» атты республикалық онлайн форсайт-форумы өтеді.

Форум 2024 жылы 100 жылдық мерейтойы биыл ЮНЕСКО көлемінде тойланып жатқан балалар әдебиетінің алып бәйтерегі, қазақ әдебиетіне өзгеше өрнек, ғажайып сыр-сипат алып келген көрнекті жазушы Бердібек Соқпақбаевтың өмірі мен шығармашылығына арналады.
Онлайн форсайт-форумға белгілі қазақстандық бердібектанушылар, журналистер, ақын-жазушылар, сонымен қатар Абай шығармашылығын зерттеп жүрген мамандар қатысады.
Форум модераторы: А.С.Пушкин атындағы ШҚО кітапханасының қызметкері Г.Абылгазинова. Форсайт-форум спикерлері:
- Самал Бердібекқызы Соқпақбаева – жазушының қызы, аудармашы;
- Ақыш Нұрдәулет Бәбиханұлы, Қазақстанның Еңбек сіңірген қайраткері, «Құрмет» орденінің иегері, Қазақстан Жазушылар одағының мүшесі және филология ғылымдарының докторы;
- Бекен Бекмұратұлы Ыбырайым - филология ғылымдарының докторы, профессор, Халықаралық Ш.Айтматов академиясының академигі, Қазақстан Жазушылар одағының мүшесі;
- Дүйсен Мағлұмов - ҚР Мәдениет қайраткері, балалар жазушысы, журналист;
- Бақыт Жағыпарұлы - айтыскер ақын, журналист, «Шалқар» радиосының аға редакторы.
Қаламгердің өлмес туындылары әлі де жас буынның кәдесіне жарап, рухын жанып, өмірге деген құлшынысын өсіріп, әділдік үшін күресуге үндеп келе жатыр. Форсайт-форумда қатысушылар Бердібек Соқпақбаевтың отбасы, замандастары, шығармалары және жазушының ел біле бермейтін адами қасиеттері жайлы сөз қозғайды.
Қазақ балалар әдебиеті бәйтерегінің жеке тұлғасына, оның шығармашылық мұрасының жан-жақтылығына қызығушылық танытқан көпшілік қауымды онлайн форумға қатысуға шақырамыз.

Байланыс тел.: 261333