«Үш бәйтерек: Ілияс, Сәкен, Бейімбет»: республикалық онлайн форсайт-форум

2024 жылы 15 қарашада сағат 11.00-де А.С. Пушкин атындағы Шығыс Қазақстан облыстық кітапханасының ұйымдастыруымен Zoom платформасында «Үш бәйтерек: Ілияс, Сәкен, Бейімбет» атты республикалық онлайн форсайт-форумы өтеді.

Форум 2024 жылы аталып өтілетін және еске алынатын күндер аясында, қазақ мемлекеттігін нығайту, ұлт санасын ояту жолында аянбай еңбек етіп, халықтың мұңын мұңдап, жоғын жоқтаған, халықтың өзі «Үш бәйтерек» теңеуін берген қазақтың маңдайына біткен тұлғалардың 130 жылдығына арналады:
– Сәкен Сейфуллин (1894-1938)
– Ілияс Жансүгіров (1894-1938)
– Бейімбет Майлин (1894-1938)
Форсайт-форум спикерлері: филология ғылымдарының докторы, профессор, Сәкен жайлы энциклопедия құрастырған ғалым Рақымов Берік Серікбайұлы; әдебиеттанушы, сыншы, Е.А. Бөкетов атындағы Қарағанды мемлекеттік университетінің қазақ әдебиеті кафедрасының профессоры, филология ғылымдарының докторы, Халықаралық Ақпараттандыру Академиясының академигі, Алаштанушы, «Үш бәйтеректі» зерделеген ғалым Смағұлов Жандос Қожахметұлы; Астана қаласындағы С. Сейфуллин музейінің директоры, тарихшы, сәкентанушы ғалым Абсеметов Марат Оралбайұлы; Жетісу қаласындағы І. Жансүгіров атындағы әдеби музейдің меңгерушісі Жауынбаева Нұргүл Қызырбекқызы; С. Аманжолов атындағы ШҚУ-нің қауымдастырылған профессоры, филология ғылымдарының кандидаты Қасенов Сәкен Тоқанұлы, сондай-ақ, Сәкен Сейфуллин, Ілияс Жансүгіров, Бейімбет Майлиннің өмірі мен қызметін зерттеп жүрген шығармашыл зиялы қауым өкілдері қатысады.
Бір жылда дүниеге келіп, шығармашылықтарын қатар бастаған қайраткерлердің өмірлері қысқа, тағдырлары ауыр болғанымен, артында қалған мұралары – ғибратты да мәнді.
Елім, ұлтым деген арыстардың ұлтжанды келбетіне, қазақ халқы үшін атқарған өлшеусіз еңбегіне, олардың шығармашылық мұрасына қызығушылық танытқан көпшілік қауымды онлайн форумға қатысуға шақырамыз.

Байланыс тел.: 261333